Побач са Статутам ВКЛ знойдзена талерка з Цмокам (фота)

Гэтую фаянсавую талерку з выявай беларускага Цмока знайшоў наш карэспандэнт у Музеі гісторыі Магілёва, які месціцца ў адноўленай гарадской ратушы.

На таблічцы пазначана, што талерка выраблена ў ХІХ стагоддзі. Як удакладнілі супрацоўнікі музея, гэтая талерка прызначалася не для ежы, а была вырабленая як насценная дэкаратыўная. Дакладная дата -- 1857 год. Музей набыў талерку ў жыхаркі Магілёва. Без сумневаў -- перад намі адна з разнавіднасцяў беларускага Цмока: Цмок Магілёўскі звычайны.

Для такой каштоўнай знаходкі музейшчыкі вырабілі спецыяльную драўляную вітрыну з замком.

Цмок Магілёўскі звычайны быў вялікім прыгажуном!

Музейшчыкі, як вопытныя людзі, знайшлі для талеркі адпаведнае месца -- усяго за некалькі метраў ад набытага ўсёй краінай у мінулым годзе Статута ВКЛ. Як памятаем, у гэтым Статуце быў адпаведны артыкул "У абарону Цмока".

Будзеце ў Магілёве -- абавязкова зазірніце ў ратушу паглядзець на талерку з Цмокам магілёўскім звычайным!