Цмок Уручанскі

Верш Уладзіміра Сіўчыкава ўвайшоў у свежаскладзеную дзіцячую кніжку "Чароўны аловак".

Цмок Уручанскі

У мікрараёне мінскім

Цмок,

Як добры чараўнік,

Пасяліўся без прапіскі

На адліжны сакавік.

Мо прытупаў ад Нямігі

У зацішлівы лясок,

Патлумачыў нам на мігах,

Што ён свойскі “дзядзька” цмок,

Не зласлівы,

А рахманы

Трохгаловы велікан,

Што ніколі не падмане

Маладзенькіх гараджан.

Крылы трэ яго “на шчасце”

Шчабятлівая дзятва,

Раніцой вітае часта

З вокнаў дома 32.

Як чароўнае сініцы

Пры музейных валунах,

Ён мне часам нават сніцца

У салодкіх мройных снах.

Мо папраўдзе

Паўз аптэку

Свежых пагартаць газет

Ходзіць у бібліятэку,

Вандраваць у інтэрнэт

Вызнаць цмокавы навіны

Пра далёкіх сваякоў

З Англіі ды з Украіны,

Пра сяброў-палешукоў...

Шэсць вачэй,

Дык пільна гляне

Наш любімы педагог.

На сасновае паляне

Ён бацькам

Спакой

Збярог.